Næsti fræðslufundur verður sameiginlegur með Stómasamtökunum og fyrirlesari að þessu sinni verður Eva Gunnarsdóttir. Hún greindist með ristilkrabbamein rétt um fertugt, þá búsett í London og hún ætlar að segja okkur frá sinni vegferð í gegnum greiningu og meðferð. Sem menntaður sálfræðingur og núvitundarkennari fór hún að rannsaka ýmsa áhættuþætti sem tengjast sjúkdómum og einkum áhrifum áfalla á heilsu.

„Að ná aftur heilsu eftir áföll eða veikindi er langhlaup, það gerist ekki á einni nóttu en með þekkingu, þjálfum og þolinmæði er hægt að ná ótrúlega miklum árangri. Það getur krafist hugrekkis að hefjast handa og að fara út fyrir þægindarammann en árangurinn sem af því getur hlotist er sannarlega þess virði“ segir Eva.

Fundurinn hefst kl. 20:00 og verður í húsi Krabbameinsfélagsins í Skógarhlíð 8, 1.hæð til hægri. Kaffi verður á könnunni og meðlæti eftir fund. Við verðum einnig live í umræðuhópnum en vonumst til að sjá sem flesta í salnum.

Þessa dagana standa samtökin fyrir vitundarvakningu á Facebook sem unnin er í samvinnu við evrópsku regnhlífasamtökin EFCCA. Þar innanborðs eru 42 samtök víðsvegar um heiminn sem taka þátt í að vekja athygli á sjúkdómunum undir yfirskriftinni „IBD virðir engin landamæri“. 19. maí er alþjóðlegur IBD dagur og fram að þeim degi munu birtast færslur á Facebook sem vonandi vekja fólk til umhugsunar um hvaða atriði þarf að hafa í huga sem gætu haft áhrif á gæði IBD meðferðar. Mismunandi þjónusta eftir landsvæðum er því miður staðreynd og þar með mismunandi aðgengi að sérhæfðu heilbrigðisstarfsfólki. Fjárhagslegar hindranir geta verið stór þáttur, m.a. vinnutap, falinn kostnaður og veikindaréttur foreldra. Erfitt getur verið að greina sjúkdómana og einnig geta fordómar og takmörkuð fræðsla stuðlað að félagslegri einangrun. Ekki er heldur hægt að leggja nógu mikla áherslu á hvað mikilvægt er að boðið sé upp á sterkt heilbrigðiskerfi sem hefur nauðsynleg úrræði, greiningartæki og lyf til að veita bestu mögulegu meðferð við IBD.

CCU stendur fyrir vitundarvakningu í Smáralind föstudaginn 3. maí kl. 15.00 Við verðum staðsett á 1. hæðinni rétt hjá Vínbúðinni og ætlum að gefa þeim sem að vilja þiggja gjafapoka sem inniheldur það sem sést á myndinni hér til hliðar. Frú Elíza Reid forsetafrú mun taka við fyrsta pokanum og þökkum við henni hjartanlega fyrir að sýna stuðning í verki við þá sem þurfa að lifa með Sáraristilbólgu og Crohns sjúkdóm.

Næsti fræðslufundur CCU verður fimmtudagskvöldið 11. apríl og fyrirlesari verður Hrafnhildur Jóhannesdóttir frá KVAN. Hún ætlar að taka fyrir SMART-markmiðasetningu, jákvæða styrkleikanálgun og hvernig er best að haga eftirfylgni. Hún fer yfir leiðir til að setja niður skýr markmið og kennir aðferðarfræði sem eykur líkur á að markmið náist og framtíðarsýnir verði að veruleika. Hrafnhildur kynnir líka styrkleikamiðaða nálgun til að virkja hæfni okkar á jákvæðan hátt og um leið verða virkari í starfi og einkalífi.

Fyrirlesturinn verður eins og áður í sal Vistor Hörgatúni 2, Garðabæ (gengið inn frá Bæjarbrautinni). Drykkir og smá snarl verður í boði og hefst fundurinn kl. 20:00. Við verðum live í umræðuhópnum en vonumst til að sjá sem flesta í sal til að taka þátt í fyrirlestrinum.

Hlökkum til að sjá ykkur

Fundurinn verður haldinn fimmtudagskvöldið 8. febrúar í sal Vistor, Hörgatúni 2. Hefðbundin aðalfundarstörf eru á dagskrá og boðið verður upp á veitingar og spjall eftir fundinn.

Næsti fræðslufundur verður fimmtudagskvöldið 9. nóvember og verður hann á persónulegum nótum. Fyrirlesarar verða Veronika Kristín Jónasdóttir og Sólveig María Ívarsdóttir. Veronika greindist með Crohn´s sjúkdóminn aðeins 16 ára gömul. Hún ætlar að gefa okkur innsýn í sitt líf og segja frá ferð sinni í gegnum lífstílsbreytingar til að taka þátt í eigin bata. Sólveig María er heilsuþjálfi og hún ætlar að fjalla um eigin reynslu, streytustjórnun og áhrif mataræðis og andlegrar vinnu á sjálfsónæmissjúkdóma. Fundurinn verður í sal Vistor Hörgatúni 2, Garðabæ og við verðum einnig "live" í umræðuhópnum.